לײען

וווּ איז דריידל?

אין דער פֿרי קומט רייזל צו לייזערן אין שטוב.

לייזער: גוט־מאָרגן, רייזל. קום אַרײַן! בײַ אונדז איז דאָ אַ מיסטעריע!

רייזל: בײַ אײַך איז דאָ אַ מיסטעריע? וואָס איז די מיסטעריע?

לייזער: מיר קענען נישט געפֿינען אונדזער הינטל.

רייזל: אײַער הינטל דריידל?

לייזער: יאָ, אונדזער הינטל דריידל. איך זוך אים און זוך. אין אַלע צימערן אין שטוב זוך איך אים.

רייזל: אוי־וויי! איך וועל זוכן מיט דיר!

רייזל: נו, לייזער, דריידל איז נישט בײַ אײַך אין שטוב. וווּ נאָך קען ער זײַן?

לייזער: אפֿשר איז ער אין פּאַרק. ער האָט ליב צו לויפֿן אין פּאַרק.

רייזל: ווילסט אים זוכן אין פּאַרק? איך וועל קומען מיט דיר!

לייזער: אַ דאַנק. איך וועל אויך ברענגען אַ בילד פֿון דריידלען.

איצט זײַנען לייזער און רייזל אין פּאַרק.

לייזער: עס זײַנען דאָ דאָ אַ סך מענטשן מיט הינטלעך, אָבער דריידלען זע איך נישט.

רייזל: לאָמיר רעדן מיט די מענטשן. אפֿשר ווייסן זיי וווּ דריידל איז. האָסט דאָס בילד?

לייזער, צו אַ מענטש אין פּאַרק: איך קען נישט געפֿינען מײַן הינטל. אָט איז אַ בילד פֿון אים. ווייסט איר וווּ ער איז?

מענטש אין פּאַרק: ניין, איך ווייס נישט.

לייזער: דאַרפֿן מיר זוכן ווײַטער… אַ דאַנק!

לייזער: נו, רייזל, מיר פֿרעגן און פֿרעגן, אָבער אַלע ענטפֿערן „ניין, מיר ווייסן נישט וווּ דײַן הינטל איז“.

רייזל: וווּ נאָך קען ער זײַן?

לייזער: המממם… אפֿשר איז ער בײַ באָבע־זיידע.

רייזל: בײַ וועמען?

לייזער. בײַ באָבע־זיידע. ער האָט ליב צו זײַן בײַ זיי.

רייזל: פֿאַר וואָס?

לייזער: ווײַל די באָבע באַקט פֿאַר אים קיכעלעך....

טריננננננג! טריננננננג!

לייזער: אָ, איך הער מײַן טעלעפֿאָן. ס'איז די באָבע! … באָבעניו!

די באָבע: לייזערל! װײסטו װאָס, ייִנגעלע? — דריידל איז דאָ בײַ אונדז!

לייזער: יאָ?! איך מיט רייזלען זוכן אים און זוכן! אָט קומען מיר!

די באָבע: גוט – דריידל וועט גיין מיט אײַך. אָבער קודם קענט איר אַלע בײַ אונדז עפּעס עסן – פֿאַר אײַך האָב איך אַ מערן־קוגל, און פֿאַר דריידלען הינטל־קיכעלעך. די הינטל־קיכעלעך באַק איך איצט!

לייזער: אויסגעצייכנט! זײַ געזונט, באָבעניו!